ગઝલ
હરિવર,આ ઝળહળતો આભાસ ક્યાંથી ?
ફૂલો જેવી કોમળ આ કુમાશ ક્યાંથી ?
શશી ને ખરીદી લીધો સ્કેવર ફીટે,
ગગન ને મળે આવો અજવાસ ક્યાં થી?
ચણી છે દીવાલો, કપાયા સબંધો,
મળે ઉડવા અમને આકાશ ક્યાંથી?
લૂંટી લાજ હેવાનો થઈ જાય બાપુ,
તરે તો તરે એમની લાશ ક્યાં થી?
અહમ નો લઈ ભાર શાને ફરે છે?
હવા જેટલી હોય હળવાશ ક્યાંથી?
દિલીપ ઘાસવાલા
ગઝલ ...નિકળે છે ☆*
સખી મતસ્ય કન્યા બની નિકળે છે,
અને એક દરિયો હજી ખળભળે છે.
હું વાંચું તને યાદના અજવાળામાં,
અચાનક શરમથી નયન આ ઢળે છે.
ઉની આંચ છે તારા સ્મિતની ભૈ,
હૃદય મીણની જેમ આ પીગળે છે.
તમારા નામે દિપ જલે ઉંબરા પર,
મધુર સ્મરણોથી હૃદય ઝળહળે છે.
હયાતી નથી તારી આ જિંદગીમાં,
હજારો પ્રશ્નો આંખમાં સળવળે છે.
નસીબમાં લખેલી મુસીબત ને "દિલીપ",
ગમે એટલી ટાળો પણ કયાં ટળે છે?
*★ દિલીપ ઘાસવાળા ★*
No comments:
Post a Comment