ગઝલ

ગઝલ- દિલીપ ઘાસવાલા
રસ્તો🎊
ખબર કોને અહીંથી નીકળી ક્યાં જાય છે રસ્તો;
વિના વાંકે બિચારો વિશ્વમાં નિંદાય છે રસ્તો;

નિહાળી કોઈ લલના ને ગલી ના મોડ પર મિત્રો;
મને બીજો કોઈ ક્યારેય ક્યાં દેખાય છે રસ્તો?

વિચારોને વિચારોમાં વિચારી જોઈ મેં લીધું;
કે એના ઘર તરફ મારા જ ઘર નો જાય છે રસ્તો;

હવે આઘા ન જાઓ મારી આંખોમાં રહો કાયમ;
જરા પણ દૂર જાઓ તેટલો લંબાય છે રસ્તો;

અધર પર સ્મિત લઇ મારી તરફ આવો તમે જયારે;
ભૂલી સઘળું ય આંખોમાં સમાતો જાય છે રસ્તો;

જગત જુએ તમોને હું તમોને દેખતો રહું છું
તમે જ્યાં જાવ છો બસ એ તરફ ફંટાય છે રસ્તો;

કદીક વેરાન રસ્તા પર નજર તારી પડી જાયે,
ને તારી ઝુલ્ફ ની ખુશ્બુ થી બસ મહેકાય છે રસ્તો;

દિલીપ ઘાસવાલા