૨, ગઝલ

શબ્દ  ધારોધાર   કમ  સે  કમ મને દેજે ગઝલ
અર્થ આરોપાર   કમ  સે  કમ મને દેજે ગઝલ

હું  મને  ભીંસ્યા  કરું  મારી જ મુઠ્ઠીમાં સતત
એટલો  પડકાર  કમ  સે  કમ મને દેજે ગઝલ

એ  મને  શોધ્યા  કરે, શોધ્યા  કરે, શોધ્યા  કરે
વ્યાપ,એ વિસ્તાર,કમ સે કમ મને દેજે ગઝલ

નોખા, અનોખા  રૂપ-રંગે  તું  મને  જન્માવજે
આગવો અવતાર કમ સે કમ મને દેજે ગઝલ

આંખમાં  ખેંગાર,  રોમે  રોમ  રાણક   ઊમટે
ગોદમાં  ગિરનાર  કમ સે કમ મને દેજે ગઝલ

.. સુરેન્દ્ર કડિયા

ગઝલ*

*નાજુક   સિતમ  ગુજારનાર , ટૂંકમાં   અમે*
*ફૂલોના    નામ    પાડનાર ,   ટૂંકમાં     અમે*

*જીતી  ગયાનો  જશ્ન  મનાવ્યો જુદી  રીતે*
*હારી   ગયા    હજાર   વાર , ટૂંકમાં   અમે*

*શબ્દોની શિલાઓને ચરણરજની રાહ છે*
*આવી   ગયા   ઉગારનાર ,   ટૂંકમાં    અમે*

*સ્વપ્નીલ    તળેટીમાં    એક  પ્રશ્ન ઉઠાવી*
*પર્વત    પૂરો   જગાડનાર ,  ટૂંકમાં    અમે*

*સીધે  સીધો   વહી જતો હતો કશે  ક્યાંક*
*મબલક   સમીર   વાળનાર , ટૂંકમાં   અમે*

.. *સુરેન્દ્ર કડિયા*