વિગતનું વળગણ- ગીત

વિગતનું વળગણ- ગીત
- મુકેશ દવે

લૂમોઝૂમો મૂછો માથે લૂખ્ખેલૂખ્ખો તાવ દઈને બેઠો છું,

ખૂલ્લંખૂલ્લા ઓટા માથે મારું આખું રાજ લઈને બેઠો છું.

ફાટેલ કોટના કાણેથી ટપકે

સિંદૂરી ગાથાઓ,

માથા વગરના ધડે વધેર્યા

શ્રીફળ સમ માથાઓ,

તાતી તગતગતી તલવારે લોહીઝર્યો ઈતિહાસ ધરીને બેઠો છું.

લૂમોઝૂમો મૂછો માથે લૂખ્ખેલૂખ્ખો તાવ દઈને બેઠો છું,

પાદર - ખેતર - ગામસીમાડે

થઈને ઊભો ખાંભી,

સેંથીમાંથી પ્રગટી જ્વાળા

આભને જાતી આંબી,

ઘરચોળાની ભાતો ફેંકી મીંઢોળબંધ સખાત કરીને બેઠો છું.

લૂમોઝૂમો મૂછો માથે લૂખ્ખેલૂખ્ખો તાવ દઈને બેઠો છું,
- મુકેશ દવે