ગઝલ

ધર્મ શું છે-અર્થ શું છે-મોક્ષ શું છે- કામ શું છે ?
કંઇ ખબર પડતી નથી કે છેવટે પૈગામ શું છે ?

સરહદો પર શ્વાસ જોડે કામ લે છે જે સિપાહી,
એ જ જાણે છે કે સાચેસાચ પ્રાણાયામ શું છે.

કાલના અનુભવ ઉપરથી સૂર્ય પૂછે છે સવારે -
બોલ, વાદળ ! બોલ, તારો આજનો પ્રોગ્રામ શું છે ?

ગામના લોકોય તારી જેમ ઈચ્છે કે જીતી જઉં ,
હા જીતી જઉં, પણ કહે કે - જીતનું ઈનામ શું છે ?

ચિત્રગુપ્તે વ્યાકરણમાં કેમ આવી થાપ ખાધી -
'શું હતું? 'પૂછવાને બદલે પ્રશ્ન પૂછ્યો: 'નામ શું છે?'

સાવ કંઈ ઠુકરાવવા જેવી નથી કંઇ વાત એની,
આંગણે દીવા મૂકો છો તો  'પવન'નું કામ શું છે ?
                  -  'પવન '