ગઝલ

ન સ્થાપીને જોયું ઉથાપીને જોયું
ફકત નામ તારું મેં જાપીને જોયું

શિકારીએ તો પાંખ કાપીને જોયું
ને પંખીએ આકાશ માપીને જોયું

અહીં  હું  ને  ચારે તરફ  ઝાંઝવા છે
મને આ સ્થળે કોણે સ્થાપીને જોયું

હું  સંજોગના  હિમખંડે  ફસાયો
મેં એવા સમે શબ્દ તાપીને જોયું

છતાં પાત્ર ખાલી ને ખાલી જ રાખ્યું
તો તેં શું હવે આપી આપીને જોયું

બધા  રંગ  રાગે તું મારામાં જાગે
વિલાસીને જોયું, વિલાપીને જોયું

અકથ એક અચરજ અલખનુ વિલસતુ
કીધા વિણ  છાતીએ  છાપીને જોયું

      ભરત ભટ્ટ