ગઝલ

બાલદિનની શુભેચ્છાઓ સાથે એક ગઝલ...

આ સ્મિત તમારી આંખોનું દત્તકમાં લીધેલું બાળક છે
આ હોઠ ઉપરની રેખાઓ વિસ્મયમાં ડૂબેલું બાળક છે

બાળક છે તમારા શબ્દો આ ભાષા તો નમેલું બાળક છે
છે આપનો આ વ્યવહાર પ્રથમ દ્રષ્ટિએ ગમેલું બાળક છે

આ ક્રોધ જે છઠ્ઠો શત્રુ છે, શાસ્ત્રોમાં કહેલું છે એવું
એ આવે તમારા ચહેરા પર તો તાવ ભરેલું બાળક છે

એથી જ જગતની સુંદરતાઓ ખોઇ છે વારંવાર અહીં
મારી આ નજરમાં સુંદરતા કાદવમાં પડેલું બાળક છે

સંપૂર્ણ જગતની શુદ્ધિઓ છે માત્ર તમારી નજરોમાં
હું તો કહું છું કે નિર્મળતા છાતીએ ચડેલું બાળક છે

- સ્નેહલ જોષી