ગઝલ

.....વધારે કંઈ નથી.

જિંદગી  ફંફોળવાની છે  વધારે કંઈ નથી .
જાતને  ઢંઢોળવાની  છે  વધારે કંઈ નથી .

આ ધરમ ને આ કરમની પોટલી ખડકી અહીં,
સત્યથી એ તોળવાની છે વધારે કંઈ નથી.

લોભલાલચ મોહ માયા ને અહંની આ રમત,
આ રમત રગદોળવાની છે વધારે કંઈ નથી.

આ સફરમાં ઝેર કે અમૃત મળે તે પી જવા,
એ પવાલી  ઘોળવાની છે વધારે કંઈ નથી .

ને ખરેખર આ કિનારા પર નહીં મોતી મળે.
ઠેઠ તળિયે બોળવાની છે  વધારે કંઈ નથી .

શ્વાસની પીંછી રહી ના જાય કોરીકટ પછી,
રંગમાં  ઝબકોળવાની છે  વધારે કંઈ નથી .

નાદનો આ લય અહો આનંદ ભીતર ઝણઝણે ,
બેઘડી  હિલ્લોળવાની છે  વધારે કંઈ નથી .

                              @ નૈષધ મકવાણા
                                            વડોદરા .