ગઝલ

ૐ તત્સત

હું  પીને વિષ તમને અમરત પાવાનો છું, ૐ તત્સત
હું  આવ્યો  છું એમજ પાછો જાવાનો છું, ૐ તસ્તત

જન્મ્યો  શું  કે  દોટ  મૂકી  મેં  મૃત્યુ તરફ એકી શ્વાસે
પણ  દોસ્તો  હું  ફોગટ  ફેરો ખાવાનો છું, ૐ તત્સત

દરિયાની   ખારાશ  સમાવી  એક  જ  બિંદુ  અશ્રુમાં
કોઈની   આંખોમાં  હું  તરવરવાનો  છું, ૐ  તત્સત

કંચન  છું  કે  કથીર  છું  એ  દ્વેષી  દૂનિયા  શું જાણે?
પારખનારો  પારખશે, પરખાવાનો  છું, ૐ  તત્સત

પર્વત પરથી ખળખળ વ્હેતા ઝરણાની સાખે કહું છું
હું  મ્હેફિલમાં મારી ગઝલો ગાવાનો છું, ૐ તત્સત

- હરિ શુક્લ

  ૨૦-૦૩-૨૦૧૮