ગીત

હરિ ! તમે તો સાવ જ અંગત સાંભળજો આ મરજી
ઘણા મૂરતિયા લખી મોકલે વિગતવાર માહિતી,
એમાં તમે કરજો, ફોટા સાથે અરજી !

હરિ હવે તો ઉંમર મારી પરણું પરણું થાઉં
હરિ, તમોને ગમશે? જો હું બીજે પરણી જાઉં?
મને સીવી લે આખી એવો બીજે ક્યાં છે દરજી?
એમાં તમે કરજો, ફોટા સાથે અરજી !

હરિ, તમારી જનમકુંડળી લખજો કોરા પાને
મારા ઘરના બધાય લોકો જન્માક્ષરમાં માને
હરિ, આપજો માગું મૂશળધારે ગરજી ગરજી..
એમાં તમે કરજો, ફોટા સાથે અરજી !

હરિ ! અમારા માવેતરને જોવા છે જમાઇ,
એક વાર જો મળી જાઓ તો નક્કી થાય સગાઇ,
હરિ ! તમારે માટે જો ને મને રૂપ દઇ સર્જી
એમાં તમે કરજો, ફોટા સાથે અરજી !

ઘરવાળાઓ ના પાડે તો આપણ ભાગી જાશું
લગ્ન કરીશું, ઘર માંડીશું, અમૃત અમૃત થાશું
પછી તમારી ઘરવાળી હું, ને તમે જ મારા વરજી !
એમાં તમે કરજો, ફોટા સાથે અરજી !

--------------------- મુકેશ જોષી.

અછાંદસ

આજે બીજી ઓક્ટોબર.
ગાંધી જયંતી.
આજે પ્રાર્થનાસભાઓ યોજાશે.
અને ઉદઘાટન સમારંભો પણ.
"સેલ " તો ખરા જ.
ઠેર ઠેર.
આજે ઘણા બાળકો જન્મ લેશે.
કેટલાક સીઝેરીયનથી.
જન્મદિન અમર બનાવવા.
કેટલાક "મોટા"ઓમાં પણ ગાંધી જન્મશે.
થોડીક ક્ષણો પૂરતો.
વળતર ખાદીના ઇસ્ત્રીવાળા વસ્ત્ર  સ્વરૂપે.
પણ.....
ગાંધી કદી મર્યો હતો ખરો ?

એ તો આજે પણ જીવે છે.
તમારામાં.
મારામાં.
કદાચ આપણા સૌમાં.
અંશ સ્વરૂપે.
અને એટલે જ....
એ અંશ
સત્યની હત્યા થતી જોઈને બોલી ઉઠે છે...
"હે રામ !"
પણ પછી....
પછી એ અંશ
ઢળી પડે છે
નિશ્ચેતન બનીને !

ડૉ. મુકેશ જોષી

અછાંદસ

🌺

આજે
2 ઓક્ટોમ્બર
બાપુની જન્મજયંતી
મનમાં થયું  કે ચાલ,
બાપુની પ્રતિમાનો ફોટોગ્રાફ
પાડી લાવું.
એમ તો છે,પણ....
ખુબ જુનો. એ..જુનો થઇ ગયો છે,ને પીળો પણ..
આંખો કે ચહેરા પરનો ભાવ હવે  સ્પસ્ટ નથી થતો.
બાપુના ચશ્માના કાચની જેમ ચહેરો પણ ઝાખો પડ્યો છે, ને  ફિક્કો પણ-
રાજઘાટ પરની
બાપુની સુંદર પ્રતિમાં પર કોઈ
સન્માનિત વ્યક્તિ પોતાનાં ખરડાયેલાં હસ્તે,
હમણા જ પુષ્પમાલા પ્હેરાવી ગયો છે.
હું જોઇ રહ્યો છું એ
પુષ્પમાલા
ને,
બાપુનો ચહેરો !
બાપુના હોઠો પર સ્હેજ સ્મિતનો ભ્રમ થતા હું  ફોટો પાડી લેવા-
મારાથી ટેવ વશ બોલાઇ જાય છે
'સ્માઇલ પ્લીઝ'
બાપુ મને સાંભળી ગયાં હોય
એમ બાપુનો પ્રત્યુત્તર મારે કાને પડ્યો
"વર્ષોથી અહી બેઠો-બેઠો  સ્માઇલ જ કરું છું,
પણ કોઇ ક્લિક નથી કરતું....
ને મારાથી ક્લિક થઇ જાય છે કરૂણહાસ્ય કરતી
બાપુની પ્રતિમાં .!
-------------------------
------મહેશચોહાણ

ગીત

બોલો બાપુ શું કહેવું છે ?
(વાંસલડી ડોટ કોમ. માંથી)

ધગધગતા સૂરજની સાખે, બળબળતી રેતીની આંખે, મારે ખળખળખળ વહેવું છે.
બોલો બાપુ  શું કહેવું છે ?
શું કહેવું છે ? ઇચ્છાઓને તોલી શકશો ? બંધ હોઠથી બોલી શકશો ?
દ્વાર હૃદયના ખોલી શકશો ? સાચું કહું એમાં રહેવું છે.
બોલો બાપુ  શું કહેવું છે ?
 
જળની ઐસી તૈસી,બંદા બાવળની મસ્તીથી ઊગે !
સ્થળની ઐસી તૈસી બંદા હવા બનીને સઘળે પુગે !
એકી શ્વાસે બંદાને આખાય વિશ્વને પળભરમાં ચાહી લેવું છે.
બોલો બાપુ  શું કહેવું છે ?

મ્હેંદીનું ઘૂંટાવું થોડું,પંખીનું વીંધાવું થોડું, ઘાણીમાં પીલાવું થોડું,
ખીલે ક્યાંક જડાવું થોડું, થોડું થોડું બધુ મિલાવી ઘૂંટી ઘૂંટી-
એમાંથી જે દર્દ નીકળે હસતાં રમતાં એ સહેવું છે.
બોલો બાપુ  શું કહેવું છે ?

જળની વાતો સ્મરતાં સ્મરતાં રણને એવું સપનું આવ્યું ,
જળના દેશે જઈને એણે જળનું એક નગર બંધાવ્યું ,
જળનું ઘર ને જળનું આંગણ,જળના ક્યારે જળને વાવ્યું ,
જળની વચ્ચોવચ્ચ રહીને જળના ભીના ભીના હાથે
જે કંઇ કોરું કરી એકઠું ભડભડભડ ચાંપી દેવું છે .
બોલો બાપુ  શું કહેવું છે ?

ધરબી ધરબી નક્કર જીવે,ખોબે સાત સમંદર પીવે,ઝબકારે જીવતરને સીવે,
ને પ્રભાત ને તરતુ મૂકે આખી રાત વલોવી દીવે,
એ લોકોની સાથે સાથે મારું પણ એના જેવું છે.
બોલો બાપુ  શું કહેવું છે ?

હું તળથી ટોચે વ્હેનારો,ખંજરની ધારે રહેનારો ને ચુપચાપ બધું જોનારો,
મારે ક્યાં કૈં સાંભળવું છે ને મારે ક્યાં કૈં કહેવું છે !
બોલો બાપુ  શું કહેવું છે ?

કૃષ્ણ  દવે.

ગઝલ

ઘણાઍ  અધૂરા  બધા     કામ છોડી જવાનું !
ઘણું અઘરું છે દોસ્ત ! આ નામ છોડી જવાનું !

જવાનું થયું છે અચાનક અમારે ક્યાં અકારણ ?
પહેલા ગલી ને પછી ગામ છોડી જવાનું !

સુરાલય, ન મદિરા, ન જામે-મહોબત્ત , રવાની ,
ન પોસાય સાકી મને આમ છોડી જવાનું !

અહીં કોણ હાર્યું ,અહીં કોણ જીત્યું સિકંદર ?
મરણ બાદ ખામોશ ! પૈગામ છોડી જવાનું !

હતી રોજ જાહોજલાલી સમય સાથ વિસ્મય ?
હતું ગુપ્ત ઍ જ સરિઆમ  છોડી જવાનું !

શૈલેશ ચૌહાણ "વિસ્મય"

ગઝલ

ઘણાઍ  અધૂરા  બધા     કામ છોડી જવાનું !
ઘણું અઘરું છે દોસ્ત ! આ નામ છોડી જવાનું !

જવાનું થયું છે અચાનક અમારે ક્યાં અકારણ ?
પહેલા ગલી ને પછી ગામ છોડી જવાનું !

સુરાલય, ન મદિરા, ન જામે-મહોબત્ત , રવાની ,
ન પોસાય સાકી મને આમ છોડી જવાનું !

અહીં કોણ હાર્યું ,અહીં કોણ જીત્યું સિકંદર ?
મરણ બાદ ખામોશ ! પૈગામ છોડી જવાનું !

હતી રોજ જાહોજલાલી સમય સાથ વિસ્મય ?
હતું ગુપ્ત ઍ જ સરિઆમ  છોડી જવાનું !

શૈલેશ ચૌહાણ "વિસ્મય"

ગઝલ

તારી ને મારી જ ચર્ચા ..

તારી ને મારી જ ચર્ચા આપણી વચ્ચે હતી,
તોય એમાં આખી દુનિયા આપણી વચ્ચે હતી!

આપણે એકાંતમાં ક્યારેય ભેગા ક્યાં થયાં ?
તોય જોને કેવી અફવા આપણી વચ્ચે હતી!

આપણે એક સાથે શ્વાસોશ્વાસ જીવ્યાં તે છતાં,
એકબીજાની પ્રતીક્ષા આપણી વચ્ચે હતી!

કોઈ બીજાને કશું ક્યાં બોલવા જેવું હતું ?
આપણી પોતાની સત્તા આપણી વચ્ચે હતી!

આપણે તો પ્રેમનાં અરમાન પુરવાના હતા,
કાં અજુગતી કોઈ ઈચ્છા આપણી વચ્ચે હતી!

આપણે તો સાવ ઝાકળમાં પલળવાનું હતું,
ક્યાં સમન્દરની તમન્ના આપણી વચ્ચે હતી!

યાદ કર એ પુણ્યશાળી પાપની એકેક ક્ષણ
કેવી લીલીછમ અવસ્થા આપણી વચ્ચે હતી!

એક ક્ષણ આપી ગઈ વનવાસ સદીઓનો ખલીલ !
એક ક્ષણ માટે જ મંથરા આપણી વચ્ચે હતી!

- ખલીલ ધનતેજવી

ગઝલ

(ગાગા   ,ગાગા  ,ગાગા , ગાગા )

તારા ના  અજવાળે  સૂરજ  ,
      તારે  પણ  ઝળહળવું થૉડું.

મોભા ની  નિશાળૉ  છોડી ,
         હિંસા  સાથે  રમવું  થોડું.

થોડા  માંથી  થોડું  છોડી ,
    આંસુ  પીવું   બળવું  થોડું .

માણસ  માણસ  રમતા  સાથે  ,
          ભઈનું  ખોટું  કરવું  થોડું.

   દૂષણની   શેરીમાં   જીવન ,
         તારે  પણ   વળવું   થોડું.

માટી  માંથી  પેદા  થઈને ,
         માટીમાં  પણ ભળવું થોડું

અમ   ધારેલું  કરવા  કરતા ,
       સૌને  ગમતા  રહવું  થોડું .
     
નીતા પટેલ

ગઝલ

दीवालों पे सजी हुई खामोश तस्वीरों की तरह ।
इक शख्स रहेता हे मुज में जंजीरो की तरह ।

ना सुख की चाह, ना हो कोई गम की परवाह।
अगर खुश रहना हे तो जिओ, फकीरो की तरह।

कहते थे वो, कुछ भी हो मगर साथ नही छोड़ेंगे।
रहते थे जो दिल में, हाथ की लकीरों की तरह।

खेल हो शतरंज का हो, खेलने में भी मजा आये।
तु राजा सही, हम भी चाल चलेंगे वजीरों की तरह।

काफी सारे दोस्त,इक कलम, और सच्चा दिल हे ।
यु ही जीता हु, जीना नही आता मुजे अमीरो की तरह।

विपुल बोरीसा

ગઝલ

મારે પણ ઝળહળવું થોડું,
અંધારે ટળવળવું  થોડું.

થીજ્યો પર્વત આંસુઓનો,
યાદોમાં ઓગળવું થોડું.

હું આ ક્ષણને ધીમે ઓરું,
જીવતર થોડું, દળવું  થોડું.

ઓશિકે સૂતી ઇચ્છાઓ,
તેથી બસ, સળવળવું  થોડું.

બાજી માંડી સાવ અમસ્તી,
અવળા પાસા, વળવું થોડું.

સંબંધો ભરડો લઈ  ઘેરે,
બોઝિલ, વાસી, ભળવું થોડું.

એકધારું વ્હેવું ત્યાં ખળખળ,
ભીંજાવું, ખળભળવું થોડું.

આજીજી તારે સરનામે,
એમ તથાસ્તુ ફળવું થોડું.

મ્હોરા એટલા, ચ્હેરો ભૂલ્યા,
દર્પણ નામે છળવું થોડું.

                        -ભાર્ગવી  પંડ્યા