આ ગઝલ લખવાની તો લત છે હજી,
એ જ મારી તો ઈબાદત છે હજી!
નામ ભૂલી ના શકાયું એ કદી,
ભૂલવાની જો કે આદત છે હજી!
ના જરા પણ ખૂટવાની છે કદી,
દર્દની દોલત સલામત છે હજી! *
ચિત્ર અદ્ભુત તારું હું દોરી શકું,
પીંછીમાં મારી કરામત છે હજી!
ના તું એ સમજી શકી કોઈ દિવસ,
લાગણીની પણ જો, કિંમત છે હજી!
આપણે સાંજે કદી મળતાં હતાં,
એ અડીખમ જો, ઈમારત છે હજી !
ના કશું બાકી રહ્યું છે આમ તો,
આવવાની ત્યાં કયામત છે હજી!
રાહ તારી આંખો આ જોયા કરે,
એની ભીતર સપનાં અક્ષત છે હજી !
ના કશી પણ ચિંતા સ્પર્શે છે મને,
એની મારા પર ઈનાયત છે હજી!
-હેમંત મદ્રાસી
No comments:
Post a Comment