૨ ગઝલ

[1/26, 12:14 PM] Hemant Madrasi: છે પ્રણયનો ભાવ,  પરખાઈ ગયો,
દિલનો ઉત્સવ આજે ઉજવાઈ ગયો !

હા, હતી એની અદામાં વાત કંઈ!
વાહ! મોંથી  શબ્દ બોલાઈ ગયો !

તારા લગ પહોંચી શકું એ પહેલાં તો,
આવતાં,  રસ્તે જ અટવાઈ ગયો !

બાદબાકી કરવી સપનાંની પડે,
અર્થ આ જીવનનો સમજાઈ ગયો !

સહેલું ક્યાં સ્વીકારવાનું એ અહીં?
સત્ય કહેતાં એથી અચકાઈ ગયો !

ભાગ પુત્રોને ના ઘરનો આપ્યો ને
બાપ વિધુર એથી સચવાઈ ગયો !

-હેમંત મદ્રાસી

જોયા જે મેં ખયાલના દિવસો,
ના શક્યો પામી વ્હાલના દિવસો!

યાદ આવે ધમાલના દિવસો,
બસ, હતા એ કમાલના દિવસો !

ના મળ્યા જેના તો કદી ઉત્તર,
એ હતા બસ, સવાલના દિવસો!

ના કદી ભૂલી હું શકું છું એ
ગાળ્યા જે તારી ચાલના દિવસો !

કેટલો ફર્ક  બેઉમાં છે જો !
કાલના ને આ હાલના દિવસો !

-હેમંત મદ્રાસી