ગીત

રૂપલે મઢી ફાગણ રાતે હાથ હવાનો ઝાલી.
અડધી રાતે બાઈ રે!હું તો શમણાં વીણવા હાલી.
સોળ ચોમાસા ઠાલવી દીધાં
ઓણ ચોમાસું પીધું
આભની ટાઢી જલધારાએ
અંગ દઝાડી દીધું.
વહેતી જાઉં હું જ બે-કાંઠે,ગામની નદીયું ખાલી.
અડધી રાતે બાઈ રે! હું તો શમણાં વીણવા હાલી.
છાબડી મારી છલકે,
ભેળી હું ય ઘણી ઢોળાઉં
માઢને મેડી,ફળિયું-શેરી,
સીમ સુધી ફોરાઉં.
પગલે પગલે ઢોળતી આવી,ધૂળમાં જોબન લાલી.
અડધી રાતે બાઈ રે! હું તો શમણાં વીણવા હાલી.
-પ્રો.મહેશભાઇ મકવાણા