સ્વપ્નને પાંપણ વિશેની વાત સાંભળવી હતી !
કે પછી વળગણ વિશેની વાત સાંભળવી હતી !
આછરેલા નીર પર હળવે હવા હિલ્લોળતી,
એ મદીલી ક્ષણ વિશેની વાત સાંભળવી હતી !
આંસુ લૂછ્યા જે રૂમાલે ક્યાં હજી સૂકાય છે ?
દર્દના કારણ વિશેની વાત સાંભળવી હતી !
આંગળી પકડી ચલાવે કોણ એ અંધારમાં,
બોલકી પાંપણ વિશેની વાત સાંભળવી હતી !
કાળજું વીંધી જતો અસવાર જ્યાંથી નીકળ્યો,
એ નગરના જણ વિશેની વાત સાંભળવી હતી !
*** નિશિ ***
No comments:
Post a Comment