ગીત

થાય મને--
       ડૉ. ભાવેશ જેતપરિયા

થાય મને-
પંખીની પાંખ બની જાઉ ને
પાર કરું આખું ખેતર અલગારું
ઓલા શેઢાનું જાય પરબારું

વીંઝાતાં સપનાંઓ આમતેમ પીછાંમાં, સળવળતું માળાનું ફૂલ;
લીલેરા ટહૂકામાં વેત વેંત વહી જતી નસનસમાં પાંગરતું મૂલ.
નજરુંની ગમતીલી રમતુમાં નૂરપૂર ઉમટી રહે એકધારું;
થાય મને પંખીની પાંખ બની જાઉં.....

વાદળનાં ઝરમરિયા વહેણ જાય મોભરે, અટવાતી દરિયાની લ્હેર;
સીમ ભરી પીવાતું, આભ ભરી ઝીલાતું, અંગ અંગ ઊતરી ગઈ મ્હેર.
વવાયું કુંડામાં સોળ રંગે નીકળતું સનનનતું બહાર મનધારુ.
થાય મને પંખીની પાંખ બની જાઉ.....