ગીત

*ગીત - હરિવર સાથે સામ્ય*

હું ને હરીવર સરખા.
સબને હમકો અપને મતમેં અલગ-અલગ સે પરખા,
હું ને હરિવર સરખા.

રાજમહેલને છોડી હરિવર
            વનવનમાં જઈ ભટક્યા,
હું પણ મારી બ્હાર જ ભટકુ;
               અંદરના સુખ ખટક્યા,
નિયતિના હાથે ફરતા રહેલા સુખદુ:ખના આ ચરખા,
સબને હમકો અપને મતમેં અલગ-અલગ સે પરખા,
હું ને હરિવર સરખા.

મારા હૃદયમાં હરિવર વસતા -
                દાનવ સાથે લડતા,
હરિના શરણે  રહી હું  લડતો 
              પડકારાઓ  કરતા,
જીવનના આ સમરાંગણમાં ગાતા જઈએ કરખા*,
સબને હમકો અપને મતમેં અલગ-અલગ સે પરખા,
હું ને હરિવર સરખા.

કોઈપણ નામ લઈને પોકારો
                 હડી કાઢતા હાજર,
નામમોહને ત્યાગી દઈએ
              પ્રેમસુધારસ ખાતર,
લાગણીઓ બસ ફાલેફૂલે નામના ક્યાં છે અભરખા ?
સબને હમકો અપને મતમેં અલગ-અલગ સે પરખા,
હું ને હરિવર સરખા.

અમારા દ્વારે આવે સુદામો
             ચપટીક તાંદુલ લઈને,
પદ-મોભાનો અંચળો ફેંકી
              ભેટીએ આદર દઈને,
નેહક્યારી ખીલે લહેરાતી; નિશદિન બરસે બરખા.
સબને હમકો અપને મતમેં અલગ-અલગ સે પરખા,
હું ને હરિવર સરખા.
- *મુકેશ દવે*

* કરખા = યુદ્ધગીત