ગીત

એક વરસાદી ગીત...

ઓ રે ! ઓ મેહુલિયા ! લ્યા, વરસી જા,થઈને તું એ નફ્ફટ !
દેખું  તારો   ચાળો ને  દેખું       તારો કેવો     રૂપાળો  છે  વટ્ટ !

વનની      વનરાઈ      થરથર     કાંપે ને     હાંફે  છે   નવખંડો,
મોડો મોડો લ્યા !    આયો તો , ખાશે  તુું  ડઘરી  ડોશીનો ડંડો !

વગડાની    વાટો ને   શ્હેરોની   સડકો    છે   કોરી   ને  કટ્ટ !
ઓ રે ! ઓ , મેહુલિયા! લ્યા વરસી જા ,થઈને તું એ નફ્ફટ !

પેલો મોરલિયો નાચી નાચી થાક્યો ને  રિશાણી છે એની ઢેલ ,
કૂં... હૂં...કૂં...હૂં...કરતી કોયલડી બેસી જોવે તારા આ ખેલ !
કોરા     છે   ખેતરના    શેઢાને      કોરી છે   નદિયુંના    પટ્ટ !
ઓ રે ! ઓ , મેહુલિયા ! લ્યા વરસી જા ,થઈને તું એ નફ્ફટ !

ખેતર   ખેડીને   વાવી   દીધા છે  મે   તો     સોનેરી      બીજ ,
રૂણઝૂણ   કરતા   આભે ના   દેખાણા  તારા વાદળ ને વીજ
દાવ   હવે   તારો તું   લઈને    કહી  દે  ઉનાળાને  કે  લ્યા હટ્ટ!
ઓ રે ! ઓ , મેહુલિયા  ! લ્યા વરસી જા , થઈને તું એ નફ્ફટ !

એ...લા...કાળિયો ને ધોળિયો  હળ  લઈને  જૂએ  તારી વાટ !
સુરજની  સાથે શું  તું  એ અલ્યા   રમવા       બેઠો       ચોપાટ ?
ઝરમર    વરસીને    ભીંજવી    દે    ગોરીની    રૂપાળી     લટ્ટ...
ઓ રે ! ઓ , મેહુલિયા  ! લ્યા વરસી જા , થઈને તું એ નફ્ફટ !

" વિસ્મય " શૈલેશ ચૌહાણ ...