ગઝલ : વિજય રાજ્યગુરુ
ભીડમાંથી હું બરાડું છું અને તું સાદ સાંભળતો નથી !
તું નજર નાખી મને તારી નજર સાથેય સાંકળતો નથી !
ધૂળ બીજું કૈં નથી એ છે પહાડોની ખરેલી ચામડી,
એટલે રસ્તો કદી ઝરણાં સમો ક્યારેય ખળખળતો નથી !
સૂર્યની જે એષણા ટપક્યા પછી થીજી જઈ તડકો બને,
મીણ શો બીબે ઢળેલો હોય છે ને તો ય પીગળતો નથી !
આ નગર છે કે ગુફા જેવું જ અજગરનું ઉઘાડું મોં ? કહો,
જે પ્રવેશે , મૂળ રૂપે એ ફરી પાછો કદી વળતો નથી !
તું અગાસીમાં ચડીને એટલું ને એ જ એ જોયા કરે,
બોરસલ્લી આટલું પથરાય પણ ચંપો હજી લળતો નથી !
27092017
No comments:
Post a Comment