ગીત
તારો અડકયો શું લાલ લાલ ગાલ
સાજન મારે રોમ રોમ ફૂટ્યો ગુલાલ
છમ છમ છમ છમ જોને મારાં , રણકયાં ઝાઝરીયાં
ને કમખામાં ફાગણ લ્હેરાય
ઓઢણીમાં મોરલાઓ ગ્હેકેં છે તાનમાં ને
હૈયું તો ફાટફાટ થાય
વાસંતી વાયરાની લ્હેરખીનો કેફ વળી
ભીતર મચાવે ધમાલ ---
સાજન મારે રોમ રોમ ફૂટ્યો ગુલાલ
મેઘધનુ જેવો તું રેલાયો મારામાં
લઈ સાત સાત રંગોની ટોળી
તારાં નયનનો ઘેરાતો રંગ પૂછે-
કેવી છે સ્પર્શની આ હોળી ?
હું તો શરમાતી, ભીંજાતી,ન્હાતી ને ગાતી રહી
ભર ભર ભર ભરવાને વ્હાલ -
સાજન મારે રોમ રોમ ફૂટ્યો ગુલાલ
રાધા એ ખેલી'તી, મીરાં એ ખેલી'તી
કરવાં હયાતીની હોળી
ઝેરનો ય રંગ ત્યાં ફીકો પડ્યો કે પછી
પ્રેમનાં જ્યાં રંગ રંગી ભોળી
ભવભવથી ભીંજાતા રહેવાને ઓરતે
થૈ ગઈ તુજ સ્પર્શે હું ન્યાલ --
સાજન મારે રોમ રોમ ફૂટ્યો ગુલાલ
કવયિત્રી---પ્રજ્ઞા વશી, તા - ૨૨- ૩ -૧૯
No comments:
Post a Comment