જાત સાથે તું કદી સંવાદ કર!
આવશે ઉત્તર, તું ધીમે સાદ કર!
ના સ્મરણને ભૂલી શકશે તું કદી!
ક્યાં જરૂરત છે કશી, ના યાદ કર!
છે અફર, આ કર્મનો સિધ્ધાંત તો,
ના કદી પણ કોઈને બરબાદ કર!
ના ટીકા ને ટિપ્પણી કર આ રીતે,
થાય તો બસ, તું સરસ આસ્વાદ કર!
જિંદગીભર માનશે ઉપકાર એ,
કોઈના જીવનને તું આબાદ કર!
છે હ્રદયમાં પ્રેમ તો તું વ્યક્ત કર!
પણ ના આ રીતે તો તું ઉન્માદ કર!
એક સરખું આ જીવન ચાલ્યા કરે,
કોઈ વાતે તો કદી અપવાદ કર!
છું તરસ્યો હું જીવનભરનો પ્રિયે,
પ્રેમનો મારા પર વરસાદ કર!
-હેમંત મદ્રાસી
No comments:
Post a Comment