ગીત

થેલો ભરીને

થેલાનો ભાર લઈ કાંધ પર
નિશાળે ઠલવાતું થાશે,
રીક્ષામાં સ્કૂટર પર સાયકલને
પગલાંનું ધમધમતું થાશે.

'બાય મોમ' 'ટાટા' હો પાપાને શબ્દમાં,
સપનાથી ખીસ્સું છલકાશે;
રસ્તા પર હોંહોંની વચ્ચે રહી,ડ્રાઈવરને
હવાલે ફૂલડું અથડાશે
ગમતિલું રમતિલું લાઈનસર શૈશવિયું,
કેમ્પસમાં ધલવલતું થાશે
થેલાનો ભાર લઈ કાંધ પર...

કોરી કટ્ પાટીની મસ્તીને, બીબાંમાં
ઢાળીને સમથળવું ડોલે,
રંગરંગ પતંગિયાં, લેશનને નિયમમાં
એક જાત પહેરીને બોલે.
હૈયામાં ધગધગતું ભાવ ઝરણ,
ઠીંગરાઈને નીતરતું ગાશે.
થેલાનો ભાર લઈ કાંધ પર....

ડૉ. ભાવેશ જેતપરિયા