ગઝલ

ગઝલ મેં તો લઇ તુજ નામ પરબારી બનાવી છે
મળે ઉજાસ જ્યાંથી એક મેં બારી બનાવી છે

કરી સરખામણી મેં ચાંદથી એમાં રિસાયા છે
કહે છે વિશ્વની નહિ પણ મને તારી બનાવી છે

હવે એકેક ક્ષણમાંથી મહાકાવ્યો રચાવાના
ભલે, હું સાચવી રાખીશ, અલમારી બનાવી છે

ગમે ત્યારે ગમે તેની થશે અર્ધાંગના પ્યારી
સ્વયંવરમાં ઊભેલી પ્રીત કુંવારી બનાવી છે

અહી તો રાહ છે વન વે, ભલે હો રંક કે રાજા
છટકબારી નહિ કિન્તુ અટકબારી બનાવી છે

તમે માનો છો કે આરામથી રહેશો મને છોડી
કટારી પ્રેમની કાતિલ ને બેધારી બનાવી છે

કરો છો કામકાજો બહુ વિચારીને તમે ‘મંથન’
પરંતુ પ્રેમની ક્ષણ સાવ અણધારી બનાવી છે
== મંથન ડીસાકર (સુરત)