ગઝલ

ગઝલ- હવે લડવું જ પડશે

હાથમાં તલવાર લઇને, હા હવે  લડવું જ પડશે,
મર્દ જેવી  ચાલ  લઇને, હા હવે  લડવું જ પડશે.

એમનો અપકાર લઇને, હા હવે લડવું જ પડશે,
મનમાં સઘળો ખાર લઇને,હા હવે લડવું જ પડશે.

છે સમય બળવાન અબળાનો એ ભૂલી જાય છે પણ,
આજ કા'તો કાલ લઇને, હા હવે લડવું જ પડશે.

દોસ્ત, ભારત માતાના ગુણગાન ગાતા આપણે સૌ,
બંદુકોનો  તાલ  લઇને, હા  હવે લડવું જ પડશે.

ક્યાં સુધી નારાં લગાવ્યે  રાખશું આ મિત્રતાના ?
યમ તણો અવતાર લઇને,હા હવે લડવું જ પડશે

હર ઘડી હર ગામમાં ખુન્નસ જાગવા લાગ્યું છે આજે,
કેસરીયા હાલ લઇને, હા હવે લડવું જ પડશે.

સરહદે  કારણ  વગર  બે-મોત  મરતા જાય સૈનિક,
સિંહ સરખી ખાલ લઇને, હા હવે લડવું જ પડશે.

મંત્રણાની  વાતમાં  સરકાર  આ 'ઉસ્તાદ' લાગી,
કંકુ  કેરું  ભાલ  લઇને, હા હવે  લડવું જ પડશે.

                  - કૌશિક પરમાર " ઉસ્તાદ "