ગીત

તારલા  જડિત  અજવાળી   રાતે  તમે  આવજો ,
મસ્તિભર્યા   ગુલાબી   સ્મિતને   સાથે   લાવજો .

મળવાને   થનગની   રહેલા   આ  અધિર  હૈયાને ,
સુકા   પાન   સમુ   છે ,   જે   ઝંખે   છે   વસંતને ,
મહેંદીથી  રસાયેલ  હાથો  વડે  પ્રેમથી  પંપાળજો ,
તારલા  જડિત  અજવાળી  રાતે   તમે  આવજો .

સુરીલા   કોકિલ   કંઠી  સુમધુર    સૂરોને  વહાવી ,
વાતાવરણમાં  મીઠી  સુગંધિત   ખુશ્બુને   ફેલાવી  ,
જમાવટ    કરતી   રંગભરી   મહેફીલ  સજાવજો ,
તારલા  જડિત  અજવાળી   રાતે   તમે  આવજો

મસ્તીમાં   મદહોશ   બનશે   વાતાવરણ    સઘળું ,
નાચી   ઊઠશે   ખુશ   થઇ   પછી   મનડું    મારું ,
તમારા   હેતભર્યા   હૈયાને   ધોધમાર  વરસાવજો ,
તારલા   જડિત  અજવાળી   રાતે  તમે  આવજો .

પલળી  જાય   મન  ને  પલળી  જાય  તન   એવી ,
માણવી   છે   'જશ'   મસ્તીભરી   ક્ષણો   સોનેરી ,
ભીની   ભીની   લાગણીઓના   ધોધને    વહાવજો ,
તારલા  જડિત  અજવાળી   રાતે   તમે   આવજો .

તારલા  જડિત   અજવાળી   રાતે  તમે  આવજો  ,
મસ્તીભર્યા    ગુલાબી    સ્મિતને   સાથે   લાવજો  .
       
                           જશુ પટેલ
                        ૨૨-૦૨-૨૦૧૭
                           યુ.એસ.એ.