ગઝલ

ભાવનો ભૂખ્યો અહીં હું જીવતો,
ભાવની થોડી ઝલક આપો મને

તું ન આવે તો બધે વેરાન જો,
આવવાની છે, તડપ આપો મને.

તું ન આવે તો થશે તોફાન જો,
હક વિનાનો એક શક આપો મને.

આજ મોસમનો તકાજો એટલો,
મૃણ્મયી ભીની સડક આપો મને.

ના કરે દાવો લગીરે ઈશ છું,
કાળમીંઢો એ ખડક આપો મને.

માંહ્યલો ઊઠેદ્રવી કો હો દુઃખી,
શુષ્ક દિલ ધબકે ફડક આપો મને.

નીતિથી લે જીવવા મન ઈચ્છતું,
કાં તમે દુનિયા અઠંગ આપો મને.

આ હ્રદય વિહવળ બને બાળક રડે,
હેત સમ મીઠી થડક આપો મને.

ભાવભીનું એક જગ આપો મને,
લાગણીભીની ગઝલ આપો મને.

પ્રેમમાં મારા, તમે પ્રગાઢ છો,
એ હસી, આભાસ શક આપો મને.

ના ગણો નાકામ, જાણું છું ઘણું,
આજ તો બસ એક તક આપો મને.

રોજ મારી યાદમાં પથરાય છે,
સ્વપ્ન છલકે એ પલક આપો મને.
ડો જિજ્ઞાસા