ગઝલ

નિરખવાનો સમય ક્યાં છે નિખરવાનો સમય ક્યાં છે?
અહીં રંગો બધા છે પણ ચિતરવાનો સમય ક્યાં છે?

તમારી આંખમાં વમળો અને વમળો જ ઘેરાતા,
ઊંડા કે છિછરા જળમાં ઉતરવાનો સમય ક્યાં છે?

સતત દોડ્યા જ કરવાનું એને ફાવી  ગયું, દોસ્તો,
આ માણસને ઠરીને ઠામ ઠરવાનો સમય ક્યાં છે ?

કશી ઓછપ નથી નો રોજ ખાલીપો હજી પીડે,
અને આ ખાલીપાને ખાલી કરવાનો સમય ક્યાં છે?

તું વરસે છે અહીં અમૃત બનીને આભથી નીચે,
અને હું બદનસીબ કે હાથ  ધરવાનો સમય ક્યાં છે?

             ભરત ભટ્ટ