ગઝલ

નથી,નથી...

તું નથી તો શું નથી-ની ધારણાઓ પણ નથી
આંખ છે પણ આંખમાં એ સ્વપ્ન કેરું રણ નથી.

હા, હથોડી-ટાંકણું લઇને  ઘડે એ જણ નથી
હું ઘડું મુજને કદી પણ એટલી સમજણ નથી.

દાંત દીધાં એ જ દેશે ચાવવાનું એ ખરું,
ના, નથી હાથીને મણ ને ત્યાં કીડીને કણ નથી.

સૂર્ય સંતાયો હવે તો રાત કેરી ઓઢણીમાં
પાદરે ગોવાળ સહ આવી રહેલું ધણ નથી.

બ્હારથી અકબંધ છે પ્રત્યેક જણ આ વિશ્વમાં
કોઈ દેખી જાય એવાં દૂજનારાં વ્રણ નથી.

તું દુ:ખી છે એકલો એવું સમજ માં જીવલા,
લાખ છે આ જગ મહીં તો...એક,બે કે ત્રણ નથી.

ડંખ દેશે તો જશે એ જીવ તારો લઈ અને,
સ્વપ્ન છે,આ સ્વપ્ન છે,કંઈ આંધળી સાપણ નથી.

કોણ છું?એ કોઈ જાણી ના શક્યું છે આજ લગ,
સત્ય કડવું કહી શકે એવું અહીં દરપણ નથી.

હું નથી - તો શું નથી-ની ધારણાઓ પણ નથી
ના નથી,ના - ના નથી, એ પણ નથી, આ પણ નથી.

      - અનિલ વાળા