કંકુ ઘોળ્યા શુકન લખી જોયા
-સંજુ વાળા
કંકુ ઘોળ્યા, શુકન લખી જોયા
સાથિયે સાથિયે સખી જોયા
ભૂર્જપત્રોને ય ઓળખી જોયા
પગ ઊધઈના ય પારખી જોયા
મૂળ થડ ડાળ ડાળખી જોયા
ઝૂલી જોયા ‘ને લખલખી જોયા
જે તને થઈ મળ્યા નર્યું ઝાકળ
એ દિવસ મેં ય ધખધખી જોયા
એ જ ઊંચાઈ એ જ આદિમતા
તળથી લઈ છેક તીરખી જોયા
સાવ સરખાં ભજન-ગઝલ ભાળ્યાં
તો, નિકટ જઈને નીરખી જોયાં
એક ફક્કડ ; ફકીર છે બીજો
હાથનાં પોત પારખી જોયાં
No comments:
Post a Comment