ગીત

સુખને તું  સુખ કહે એમાં શું ?
દુઃખના છેડાને સ્હેજ ખેંચે, ‘ને ચોમાસું  બેસે  તો  કૈક  થયું  જાણું !

ઝાડને મળે છે એનાં પાંદડાઓ
એજ  રીતે  આપણને  મળ્યું  હોય  ટળવળવું
લખીએ નિબંધ : જાત ઝુરાપો
કવિતામાં કહીએ તો જીવનો સૂકાવો ‘ને બળવું
એટલે કે સો ટચનું સંવેદન રૂપકડા જિલેટીન પેપરમાં વીંટી ઉછાળું
દુઃખના  છેડાને  સ્હેજ ખેંચે, ‘ને ચોમાસું  બેસે  તો  કૈક  થયું જાણું !

વેંત-વાંભ  રહી જાતી ઊંચાઈ આંબવાની
નિસરણી   શોધવાની  કઈ  રીત   સાચી ?
દોડીને  થઈ જાવું રેલો, કે
ઘરમાં બેસીને રોજ છાપામાં વાંચવાની રાશિ ?
જાવા દે, તારી સાથે નહિ બને: એમ કંઇ નાળબંધ પર્શ્નોનું ઉઘડશે  તાળું ?
દુઃખના  છેડાને  સ્હેજ  ખેંચે, ‘ને  ચોમાસું   બેસે  તો   કૈક  થયું   જાણું !
-     સંજુ વાળા