ગીત

ઈચ્છાની મોંકાણ - ગીત

અલી ઈચ્છલી ! શાને તું વળગી છો છાતીએ ?

ખાટલો જો હોય એમાં વાણલાં ગૂંથાવીએ
ને પાથરીએ મખમલ્લી ધડકી,
આભલે મઢેલા એ ય વિંઝીએ વિંઝણા
ને નિંદરની હાંકીએ હોડકી,
લાંબા પનાના આખાયે આયખાને ટૂંકી ચાદરમાં શું માપીએ ?
અલી ઈચ્છલી ! શાને તું વળગી છો છાતીએ ?

લખી દેવું છે મારે આખું આ ગામ અને
આપી દઉં દોમદોમ સાહ્યબી,
સામટો ખજાનો ઓળધોળ કરીને પછી
પહેરાવુ સાતરંગી કાચબી,
પણ; પહેરણના ગજવાં જ્યાં ફાટેલાં હોય ત્યાં આપીઆપીને શું આપીએ ?
અલી ઈચ્છલી ! શાને તું વળગી છો છાતીએ ?
-  મુકેશ દવે