તણખલા શબ્દનાં તૂટી ગયા શું?
ને પરપોટા બધા ફૂટી ગયા શું?
હવે માથે કોઈ મીંડું ન મળતું,
અનુસ્વરો બધા ખૂટી ગયા શું?
અરે આ સૂર્યનું તૂટેલ પૈંડું,
અને અશ્વો બધા છૂટી ગયા શું?
ચહેરા કોઇ દર્પણમાં ન ફરકે,
પ્રતિબિંબો બધાં ફૂટી ગયા શું?
હૃદય વેરાન ઉજ્જડ પાટનગરી,
કે ઈચ્છાના દળો લૂંટી ગયા શું?
રદીફ આધાર શોધે શૂન્યતામાં
ખરે ખર કાફિયા ખૂટી ગયા શું?
ગઝલ ટાપૂનું આ એકાંત આદિલ,
બધાયે સેતુઓ તૂટી ગયા શું?
- *આદિલ મન્સુરી*
No comments:
Post a Comment