ર, ગીત

હોળી પર્વની સુકામનાઓ સાથે*

*ગીત*
તું ભલેને આજે પ્રગટાવ હોળી,
કેસુડાનું શીતળ જળ થઈ ઠારજે હૈયાહોળી.....તું ભલેને.

કોઈને હૈયે ઘાવ પડ્યા છે,
કોઈ-કોઈને ખૂદના નડ્યા છે,
કોઈના અંદર ખૂણા રડ્યા છે,
કોઈને નિરાધાર ઘડ્યા છે,
રવરવમાં ઠંડક ભરી દેતી કસુંબી દેજે ઘોળી,
કેસુડાનું શીતળ જળ થઈ ઠારજે હૈયાહોળી.....તું ભલેને.

કોઈ સૂના ઘરની ભીંત રડે છે,
દૂર ક્ષિતિજે અંધાર ચડે છે,
ભાવી થઈ ભેંકાર અડે છે,
મનમાં કંઈ દાનવ લડે છે,
આ પીડબંકાને દોખજમાંથી કાઢજે ખોળી ખોળી,
કેસુડાનું શીતળ જળ થઈ ઠારજે હૈયાહોળી.....તું ભલેને.

*વિશ્વ ચકલીદિવસની સુ-કામનાઓ*

*ગીત*
ચકલી તારાં ચીંચીંકઢા ચકલીવેડાં મેલ,
માણસની જાત જેવા ખેલવાના થાય હવે રોજરોજ નવાનવા ખેલ......ચકલી૦

ખીંટી ને ગોખલા લીસીલસ્સ ભીંત
              ને આભલાંને ઓરડે પૂર્યા,
હારબંધ બેઠેલી છબીઓના દેવતાઓ
                       પોટલે બંધાઈને ઝૂર્યા,
તોરણ ને કૂંડામાં ઝૂલવાના ઓરતાને હળવેથી પાછાં ઠેલ.....ચકલી૦

ચોખાના દાણાં હવે વારતામાં ગૂમ ને
                થયા બાજરા કપાસના પૂમડાં,
ઝાડવાની જાત એવી વંઠેલી નીકળી
                      કે બંગલા બની છે રૂપકડા,
આબરૂને ચીરીને શીદને ત્યાં ન્હાવું ! ઓલી માટી ડામરની રખેલ....ચકલી૦
- મુકેશ દવે