ગઝલ

(ગઝલ)

કાકલૂદી , આજીજી  કરવાના  'દી આવ્યા હવે;
ખાનગીમાં માંગણી કરવાના 'દી આવ્યા હવે.

ચાંપલૂસીને  બડી  કરવાના  'દી આવ્યા હવે;
ભાઈગીરીને  ખરી કરવાના  'દી આવ્યા હવે.

થઈ  ગઈ બુઠ્ઠી કલમની ધાર એવું લાગે  છે ;
કરગરીને  શાયરી  કરવાના 'દી આવ્યા હવે.

સત્યને , સિધ્ધાંતને કોરે મૂકો તો શાણપણ;
તક મળે તો રોકડી કરવાના 'દી આવ્યા હવે.

શકિતશાળી  કોણ? ઈશ્વર? સત્તા, પૈસો કે પછી-
આજે  પૂરી  ખાતરી કરવાના 'દી આવ્યા હવે.

જાત બાળી સ્વંયને અજવાળવાનો અર્થ શું?
તેજ માંગી ચાંદની કરવાના 'દી આવ્યા હવે.

કાલના કડવા અનુભવ આજને સમજાવે છે;
માનવીની બંદગી કરવાના 'દી આવ્યા હવે.

મંચના  જોરે  ગઝલકારો  સુખી  સંપન્ન  છે ;
પણ ગઝલને ખુદકુશી કરવાના 'દી આવ્યા હવે.

પાપને "નાશાદ" આપો સ્વીકૃતિ સલુકાઈથી;
ધર્મને હમણાં નહીં કરવાના 'દી આવ્યા હવે.

                ગુલામ અબ્બાસ "નાશાદ"