કંઈ કેટલી પીડાઓ, કંઈ કેટલી વ્યથાઓ!
કંઈ કેટલાં ય આંસુ, કંઈ કેટલા સવાલો!
અઘરો છે દાખલો આ, જીવન છે નામ જેનું;
કંઈ કેટલી યે ભૂલો, કંઈ કેટલું સુધારો?!
આગળ વધું કે અટકું? પાછો ફરું કે પહોંચુ?
કંઈ કેટલા છે રસ્તા, કંઈ કેટલા પડાવો!
ધસમસતા વહી જવાનું, ઊભા ય રહી જવાનું!
કંઈ કેટલી દિશાઓ, કંઈ કેટલા પ્રવાહો!
મનમાં ભરી અદાલત, આરોપ છે હૃદય પર;
કંઈ કેટલી દલીલો, કંઈ કેટલા બચાવો!
આવી ચૂકી અચાનક છૂટી જવાની વેળા!
કંઈ કેટલા પથારા, કંઈ કેટલો ઉધામો!
: હિમલ પંડ્યા
No comments:
Post a Comment