ગઝલ

શહેરનું ખૂટલપણું ના ગામડું લાગી શકે,
તો પછી ક્યાંથી બધું આ આપણું લાગી શકે!

ખૂબ મોટું છે જગત તું  બહાર જઈને તાકને,
બારીમાંથી દ્રશ્ય આખું સાંકડું લાગી શકે.

દોસ્ત મારા આ બધું રિયાઝ નું પરિણામ છે,
સાવ  નબળું તારું ઈંગ્લીશ ફાંકડું લાગી શકે.

ભીતરી સંવેદના સંબંધમાં તો મુખ્ય છે,
સ્નેહ વિના હૂંફ તારી તાપણું લાગી શકે.

સાવ આ વેરાન છે મારું હૃદય વગડા સમું,
તું જરા પગરવ  કરે  તો આંગણું લાગી શકે.

તું જ મારુ લાભ શુભ છે કંકુ લઈને આવને....
શક્ય છે સૂની દીવાલે બારણું લાગી શકે.

પીયૂષ ચાવડા