બસ , સમય સાથે બધું ભૂલાય છે,
પણ, સ્મરણ કોઈ સદા સચવાય છે !
ગીત જાણે જિંદગી ખુદ ગાય છે,
યાદમાં મન એ રીતે ભીંજાય છે !
ના કશું કારણ તો છે એનું છતાં ,
કોઈ વાતે આજે મન ગભરાય છે !
જિંદગીમાં ચાલે છે એવું સદા,
કોઈ આવે છે ને કોઈ જાય છે !
હું ઈશારો ક્યારનો કરતો રહું ,
ના તને એ સહેજ પણ સમજાય છે !
બીજું કોઈ તો વસી ક્યાંથી શકે ?
કોઈ મનમાં ઘર કરી જો જાય છે !
એવું ને એવું બધું છે યાદ જો !
ક્યાં કશું વર્ષો છતાં બદલાય છે !
- હેમંત મદ્રાસી
No comments:
Post a Comment