ગઝલ

ગઝલ : વિજય રાજ્યગુરુ

જવાનું મન નથી  ને જાઉં છું ! 
ચરણ ચાલે ને  હું  રોકાઉં છું !

તમારી ઝાંઝરી  જ્યાં રણઝણે, 
તરંગો   જેમ   હું   ફેલાઉં  છું !

તમે   ખુશ્બૂ    વિખેરી   એટલે ,  
પવન  ઉન્મત્ત  થઈને  વાઉં  છું !
    
ઝરૂખે   રોજ   ઝૂલો   છો  તમે ,
અને હું  ડાળ થઈ  લંબાઉં  છું !

તમે  જે  ધૂન  મીઠ્ઠી  ગણગણો  ,
બનાવી  ગીત  એનાં   ગાઉં  છું .
    
ભરત  ભરતા  તમારા   હાથથી ,
રૂમાલે  હું  જ  હું   ગૂંથાઉં   છું .

નદી થઈને વળો  છો  જો  તમે  ,
કિનારા જેમ  હું  અમળાઉં  છું !
    
ફરેબી  છે હવા  ને સ્નેહ પણ ,
ઝઝૂમી   આખરે  બુઝાઉં  છું !

તમે   શોધી  શકો  તો  શોધજો ,
તમારી    ભીતરે    સંતાઉં    છું !