રસ્તા કદીક ભટકી ગયો છું ઝાંઝવાના શ્હેરમાં,
હોવાપણું ભૂલી ગયો છું ઝાંઝવાના શ્હેરમાં.
સાચું કહું દોસ્તો,મને એ પણ ખરેખર યાદ નથી,
કે હું શું શું ભૂલી ગયો છું ઝાંઝવાના શ્હેરમાં.
એ ઝાંઝવાને પામવાની ઝંખના મારીય છે,
ને તોય એક રણ પી ગયો છું ઝાંઝવાના શ્હેરમાં.
આ ડાળપણું જાતું નથી,ઉદાસ ટ્હુકાના ભારથી-
લાગે છે હું બટકી ગયો છું ઝાંઝવાના શ્હેરમાં.
મેં સાચવી રાખી છે એક મુસ્કાન મારા હોઠ પર,
ને ભીતરે તૂટી ગયો છું ઝાંઝવાના શ્હેરમાં.
મેઘરાજસિંહ પરમાર.
No comments:
Post a Comment