ગઝલ

પાછો આવું છું

રાહ જો જે જિંદગીના મર્મ માણી પાછો આવું છું
જીવતરને નવો અર્થ આપી પાછો આવું છું

દૂર છતાં તને મારી અનુભૂતિ થતી રહેશે
જાતને નવા શિખર બતાવી પાછો આવું છું

ઈશ્વરની આરાધના તો નિત્ય જ કરવી રહી
પરમનો ખજાનો નિહાળી પાછો આવું છું

મારી યાદોને મમતાથી પલ્લવિત કરજે
પ્રેમભીનું ઉપવન સજાવી પાછો આવું છું

વિરહ-મિલનથી હવે જરા ઉપર ઉઠીએ
સમર્પણની શીખ પચાવી પાછો આવું છું

મારા આરાધ્ય, ઓ મારા પથ-પ્રદર્શક
તારામાં હું સ્વયં ને ઓગાળી પાછો આવું છું

દિલીપ શાહ