રામની ભોંયમાં રામની ખેતરવાડીએ જી,
આપણા નામની અલગ છાપ ન પાડીએ જી.
જગને ચોક ચબૂતરે વેરી રામધણીની જુવાર,
તે પર પાથરી બેઠો તું તો ઝીણી પ્રપંચની જાળ;
ધર્માદાચણથી પંખી ન ઉડાડી એ જી.
રામની...
રામની વાડી ગામ આખાની હોય ન એને વાડ;
બાંધ જો તારું ચાલતું હોય તો આભને આડી વાડ;
વાડ કરી આ ક્ષિતિજ ના વણસાડીએ જી.
રામની...
રામની વાડી ભોગવવી ભાઈ, હક્ક નાં પાઈ નીર,
સૌને વ્હેંચી ચાખવી આપણે રામના ફળની ચીર,
આપણા ભેગાં સૌનાં ભાણાં માંડીએ જી.
રામની....
- નટવરલાલ કુબેરદાસ પંડ્યા
'ઉશનસ્'
No comments:
Post a Comment