ગીત
શરદપૂનમની શીતળ રાતે મધુમાલતી તને જોઈને--
મંદ મંદ મુસ્કાતી!
લાગે એને કોઈ બીજું છે મધુમાલતી સરખું;
ધીમે ધીમે એ પણ ભીતર છલકાવી શરમાતું;
પછી ધીમેથી રૂપ પાથરી મનમાંહી મૂંજાતી !
મંદ મંદ મુસ્કાતી!
ચન્દ્ર ચઢે જ્યાં આકાશે ત્યાં અંદર કંઈ અમળાતું;
અંદરથી પ્રગટીને કોઈ મીઠું મીઠું ગાતું;
પછી ભીતરની મઘમધ મૂરત સામે આવી જાતી !
મંદ મંદ મુસ્કાતી !
હવે તમારું હોવું સાચ્ચે હોવાથી જ જણાતું ;
એમાં ડૂબી જાઓ; કોઈ ચન્દ્રકિરણમાં ન્હાતું !
મનનો વૈભવ પ્રગટે ત્યારે શરદપૂનમ સરજાતી !
મંદ મંદ મુસ્કાતી !
ગુણવંત ઉપાધ્યાય
No comments:
Post a Comment