ગઝલ

*🍃ઘણા ઊંચા મિનારે છું🍃*

હજીપણ હું પ્રણયના એ જ સાગરને કિનારે છું;
વિતેલા એ સમયની એ જ યાદોને સહારે છું.

થયો આભાસ તારો જ્યાં મને ગઈ કાલની સાંજે,
હવે તો ત્યારનો ત્યાં રોજ સાંજે ને સવારે છું.

અરે ! આ મયકશી જેવી મજા બીજી ન હો સાકી,
નશામાં ચૂર સુરાના, આજ થોડો નહિ, વધારે છું !

ભલે, લિલામ થઈ ગઈ ત્યાં હૃદયની લાગણીઓ સૌ,
હવે છું તોય એવી લાગણીઓની બજારે છું.

જમાનો છો મથે પણ નહિ મને એ તોડી શકવાનો,
ભલે, હાર્યો જરા, પણ તોય તૂટ્યો ક્યાં લગારે છું ?

'પ્રદીપ' તારા સ્મરણનો ના બુઝે મારા હૃદયમાંથી,
ફરીથી હું સમયના એ ઘણા ઊંચા મિનારે છું.

*— પ્રદીપ સમૌચા*