ગીત

ગીત ________________ હેમંત ગોહિલ "મર્મર "

આ તે કૌતુક કેવું ?
મીરાં કહે છે મોર ચણે છે ;રાણા કે' પારેવું .

પડી નગારે દાંડી ,ચહુદિશ શંખ ફૂંકાવા લાગ્યા ,
મીરાં મંદિર હાલ્યાં; રાણા રણમેદાને  ભાગ્યા .
મીરાં કહે છે ઝાલરટાણું ; રાણા કે'  યુદ્ધ જેવું .
___________________ આ તે કૌતુક કેવું ?

મીરાં ચંદન ઘસતા રાણા સમજ્યા કે તલવાર્યું ;
કુમકુમ તિલક ભાલે કીધું રક્ત્બિંદુ ત્યાં ધાર્યું .
મીરાં  નીરખે નખશિખ મંદિર ,રાણાનું શું કહેવું ?
___________________ આ તે કૌતુક કેવું ?

રાણા કે' પથ્થરિયા ગઢ મેં કોર્યા ઠામેઠામ ,
મીરાં કે' સાગમટે આંગણ આવ્યાં શાલિગ્રામ.
મીરાં કે' વરસાદ પડે છે ;રાણા કે' છે નેવું .
    ___________________ આ તે કૌતુક કેવું ?

___ હેમંત ગોહિલ "મર્મર "