ગીત - ઓલિયો મનેખ
લોહી જેનું છે વૈષ્ણવજન ને હૃદયે શંભો બિરાજે,
બજરંગી છાયા રવરવ છાયી આશ કરું ક્યાં દૂજે ?
નામ-જપમાળા કણકણ પ્રગટી
પળપળ મનમાં બોલે,
હૈયે રણઝણ ઝાલર વાગે
ભેદ ભરમના ખોલે,
ભજન ધૂનની હેલી એને ઊઠતી મૃદંગ-મંજીરા સાજે.
બજરંગી છાયા રવરવ છાયી આશ કરું ક્યાં દૂજે ?
શાતા ધરતા ઓલિયા મનેખની
ધજાયું ફરફર ફરકે,
થઈ પરબ ને; બની વિસામો
મરકમરક મુખ મલકે,
આ દર્દખોળાના દર્શન હો તો મંદિર જવું ન સૂઝે.
બજરંગી છાયા રવરવ છાયી આશ કરું ક્યાં દૂજે ?
- મુકેશ દવે
No comments:
Post a Comment