ગઝલ

હું અહીં મારો જ છું એવું નથી.
તેથી કૈં તારો જ છું એવું નથી.

રાખ ખંખેરી ને અડકી તો જુઓ,
ફક્ત અંગારો જ છું એવું નથી.

તારા મનગમતા જગતનો ભાગ છું,
તારો ધબકારો જ છું એવું નથી.

રાતરાણીનું ભલે તું ફૂલ હોય,
ડાળ છું, ભારો જ છું એવું નથી.

ઘરથી નીકળી તો જો, તું છત્રી વગર,
કોઇ વર્તારો જ છું એવું નથી.

હું વિનયમાં હા ભણી લઉ છું કબૂલ,
માત્ર હોંકારો જ છું એવું નથી.

હું ય મોતી રાખું છું પેટાળમાં,
એકલો ખારો જ છું એવું નથી.

ફાટતા સંબંધને સીવું છું દોસ્ત,
સોયનો દોરો જ છું એવું નથી

કોઇપણ ઘડીએ કશું પણ માંગજો
તૂટતો તારો જ છું એવું નથી

ગૌરાંગ ઠાકર