ઇતિ સિદ્ધમ!
તમે છો આયનામાં પણ હું દેખાતો, ઇતિ સિદ્ધમ!
ફૂલોની સોબતે કાંટો ય મ્હેકાતો, ઇતિ સિદ્ધમ!
તમે છો, તમને જોઈને જ શરમાઈ ગયું આકાશ!
અમે ગુલાલ જોયો આભે વિખરાતો, ઇતિ સિદ્ધમ!
તમારા હોઠને તરસી રહ્યો છે વાંસનો ટૂકડો!
ને અમને વાંસળીનો સૂર સંભળાતો, ઇતિ સિદ્ધમ!
ભલેને હોય વિષ કે હોય અમૃત, શું થશે બોલો!
ભલેને હાથમાં પ્યાલો, ન પીવાતો, ઇતિ સિદ્ધમ!
પહાડોની વચાળે ખાઈઓમાં સાંભળું છું હું!
તમારી વાંસળીનો સૂર પડઘાતો, ઇતિ સિદ્ધમ!
રદીફ ને કાફિયા, છંદો રૂકન ને જાળવી જીવ્યો!
કંઈ અમથો હું શાયર ન્હોતો કહેવાતો, ઇતિ સિદ્ધમ!
હું આગળ, મારી પાછળ મારો પડછાયો હતો હરિયા!
હતો મારો ને મારાથી જ સંતાતો, ઇતિ સિદ્ધમ!
- હરિહર શુક્લ
૨૦-૦૭-૨૦૧૭
(રિવ્યુ માટે)
No comments:
Post a Comment