ગીત
આંખોમાં સપનાંની સૃષ્ટિ,
ને હૈયામાં જીવતરની હામ.
અધુરપને મધુરપમાં ફેરવી,
વ્રજમાં જીવું છું હું શ્યામ !
વનરા તે વનના ગિરિવર શિખરો ને,
યમુનાના ખળખળતા વહેણ.
કદંબના ઝાડની ટોચ પર,
બેઠો છે મારો ને તારો લેણદેણ.
ઝાકળની જેમ પુષ્પના પર્ણ પર,
સ્પર્શ્યો છે સ્પર્શ તમામ.
અધુરપને મધુરપમાં ફેરવી,
વ્રજમાં જીવું છું હું શ્યામ !
પવનમાં લહેરાય વાંસળીના સૂર,
ને કાનમાં સંભળાય ગોપીનું ગીત.
કયો ચિતારો ચીતરતો રહે,
પ્રિયતમ ને પ્રિયતમની પ્રીત.
મથુરાનો મારગ સાદ પાડે મુજને,
મનના ઘોડાની હું ખેંચું લગામ.
અધુરપને મધુરપમાં ફેરવી,
વ્રજમાં જીવું છું હું શ્યામ !
***
-'કાન્ત'
No comments:
Post a Comment