ગઝલ

હવે હું બધાથી છું ઉંચે, હવામાં,
મને કોઈ નાખી ગયું ત્રાજવામાં.

અમારી પ્રતીક્ષાનું મૃત્યુ થયું છે
તમે સ્હેજ મોડું કર્યું આવવામાં

તમારી કૃપાથી જ લાંબુ જીવાયું
અમે ઝેરને વાપર્યું છે દવામાં

કદી ચકલી આવી પછાડે નહી ચાંચ!
અરીસો ઉગ્યો છે કે શું ઝાડવામાં?

મને યાદ આવે છે જૂની તબાહી
એ જ્યારે પુછે છે કે શું છે નવામાં ?

અમે રણમાં પ્હોંચીને  ઊભી કરી છે
ગળાકાપ સ્પર્ધા બધા ઝાંઝવામાં

ભાવિન ગોપાણી