ગઝલ

આંગળી ઝાલતી માં વિષે શું લખું ?
સહુને સંભાળતી માં વિષે શું લખું ?

સ્મિત ફરકાવતી માં વિષે શું લખું ?
આંસુ છુપાવતી માં વિષે શું લખું ?

રોજ ઘર વાળતી માં વિષે શું લખું ?
જિંદગી સવારતી માં વિષે શું લખું ?

ઊંઘ ખોળા મહીં આવતી'તી દુર્લભ
પીઠ પસવારતી માં વિષે શું લખું ?

ભૂલ ચૂક માફ કરતી, ક્ષમા આપતી,
પ્રેમે પુચકારતી માં વિષે શું લખું ?

અંધકારો સહ્યા નવ મહિના છતાં
કોખ ઉજાળતી માં વિષે શું લખું ?

પેટ  ભરવા  સહુના,  ચૂલાની  સંગે
અંગ અંગ બાળતી માં વિષે શું લખું ?

સ્થિર બેસે જરા તો હું  કંઈક લખું
દોડતી, ચાલતી માં વિષે શું લખું ?

એ ઉજાસે મળી છે સવારો સુખી
રાત અજવાળતી માં વિષે શું લખું ?

           સુધીર દત્તા