ગઝલ

વીરડો શ્રદ્ધા થકી આ રેતમાં ગાળી જુઓ, *
ને પરમને સૃષ્ટિના કણકણ મહીં ભાળી જુઓ.

આવશે પડઘો ય સામો પ્રેમથી જો સાદ દો,
'હું પણા'ને કોર મૂકી અહમ ઓગાળી જુઓ.

ધૂપ,ઝાલર,આરતી,મણકા મહીં એ ક્યાં વસે?
દીવડો ભીતર જલાવી પોત અજવાળી જુઓ.

કાળજું પાષાણ નૈં છે મીણ કરતાં પણ કુણું,
કોઈના આંસૂ થકી એનેય પીગાળી જુઓ.

બુદ્ધના રસ્તે જવાની એ જ તો પ્હેલી શરત,
વળગણોમાંથી જરા આ જાતને વાળી જુઓ.

- ધૃતિ  ઉપાધ્યાય

* તરહી રચના